Tituš Brezovački. Matijaš grabancijaš dijak

Tituš Brezovački Matijaš grabancijaš dijak

SADRŽAJ PREDGOVOR 4 DOGOD I. 6 DOGOD II. 16 DOGOD III. 28 RJEČNIK 45 2

Zavjetek 1 Dobri navuki jesu temelj tak osebnoga, kak opčinskoga dobra, ar po oveh človek tak sebe, kak bližnjega ravnati i od zla na dobro vuputiti zna. Dogodov ispeljiteli: MATIJAŠ, kakti dijak grabancijaš, kakti trgovec SMOLKO, šoštar VUKSAN, krznar JUGOVIČ, plemeniti pravdoznanec VESELKOVIČ, pazitel na segurnost opčinsku KOPRINOVIČ, prisežni pazitel na pute PISAROVIČ, varaški pisar LAZO Smolkovi detiči GAJO PRVI dva muži DRUGI HANZL, oštarijaški sluga. Dogod speljava se vu Zagrebu. 1 zavjetek - proslov, motto 3

Predgovor k dobrovoljnomu čtavcu Dogoda igru ispeljanu ovak, kak ovde je, Tebi za krajši čas alduvati hotel jesem, Dobrovoljni čtavec. Budeš videl dijaka, Kojemu stari ime grabancijaša prideli jesu; Čul budeš od njega, Kulika je hasen napretka vu dobreh navukeh, Koji tak osobno, Kak opčinsko dobro porađaju. Kajti pak ovakve igre negda pri Grkih, Potlam pri Rimlanih, Iz takovoga cila zmišlene i igrane jesu, Da i krepostih cenu, I faling odurnost pred oči postaviju, I po tom dike želju, Koja jedina dobro držanje kinči, Vu nas povekšaju, Zato, kak odurne i buduče sreče porušlive Nekoje falinge jesu vu vezdašnjeh, Najbolje pak mladeh sveta ljudih, Moj dijak več vu peldah, kak vu navukeh kaže. Ako morebiti oštreši bude, kak bi vnogi željel, Prosim, da ne zameriš, Ar stoprav je iz škol izišel, Kade istinu govoriti i činiti je se navčil. Zato, ufam se, Da z istinum svojum tebe ne zbantuje, Ar sem vupučen, da je tebi dobro znano, Da niti kreposti pohvaliti, Niti falinge popraviti prez istine ni moguče. K istini svoji priložil je moj dijak I takva tulikajše, Koja razveseliti i na smeh genuti (Z navukom) mogla budeju. Ar se je trsil nasleduvati one reči, Koje negda jeden pesmoznanec je zgovoril, 4

Najmre: Vsu dužnost je spunil, Koj je hasnovito z vugodnem I smešnem zmešal. Ovu anda igru I istinu za dobro primi, d. čtavec. Ako hvalu kakvu od tebe zaslužil jesem: Ovu tebi pripisati dužen budem, Koj cenu svoju istini skratil nisi; Ako nikakvu: mene bi moral kriviti, Ako vsem po volji včiniti bi mogel, Pak ne bi hotel. Zdrav ostani. 5

DOGOD I. Spelanje I. Smolko i Vuksan VUKSAN: Dobro jutro, dragi sused. SMOLKO: Ah, kak srečen je on, komu more dobro biti, ali meni je vsako jutro žuhko i vsaki večer čemeren. VUKSAN: Kak to, moj sused? SMOLKO: Ah! kak ne; kaj jošče niste čuli, da se je moja žena pred dvemi dnevi na vrtu na hrušku obesila? VUKSAN: To su mi prvi glasi, ar sem do denes pod Okičem na senjmu bil, i kak sem došel, otpravil sem se k vam, da vas vidim i z vami se spomenem. SMOLKO: Ah, istina je, istina, i ova istina mene jošče v grob spravi. VUKSAN: Zakaj? - Mort zato, da ste vdovec? - O, kak vam je osvenulo, da ste se hižnoga nemira oslobodili, zakaj se anda budete žalostili? SMOLKO: Jošče denes sem nakanil žalosten biti i zutra čisto zabiti. VUKSAN: Tak je najbolje, ar treh dnevov žalost je za vsakoga poštenoga tovaruša dosta. SMOLKO: Tak sem i ja mislil. VUKSAN: Prosim vas, moj sused, budite tak dobri i dajte mi jednu barem svrž od onoga dreva. SMOLKO: Ah! slobodno celo drevo s korena si skopajte i zežgite. VUKSAN: Bog začuvaj takve kreposti drevo žgati; bi smrtna grehota bila. Ja si samo šibicu vzemem i vu mojem vrtu vcepim, mort da i ja tak srečen budem, da koje jutro takvu hrušku na njem najdem. SMOLKO: Ah! tužni ja, na kaj sem ja došel! VUKSAN: Iz zla na dobro, - imate hižu, tirate meštriju 2, držite detiče: vsaki dan, ako ne bu curelo, bude vendar gusto vu mošnju kapalo; ne bude se po kuteh kava pila; ne budu se svilne oprave drle, nego šporno i zadovoljno bude se jelo, marlivo delalo, vu hiži mirovno živelo, i ovak srečni postanete. - O! da sem ja znal, kakve je kreposti vaša hruška, ja bi si vre pred desetemi leti jednu svrž vu mojem vrtu bil vcepil, mort da bi vre vezda jednakoga sada doprinesti mogla. (Matijaš zvana kuči). SMOLKO: Gdo si božji? 2 tirati meštriju - tjerati (voditi) zanat 6

Spelanje II. Matijaš i prvi MATIJAŠ: Dober dan, poštuvani meštri. SMOLKO: Dober dan, moj gospone; prez zamere, gdo ste vi? MATIJAŠ: Ja sem dijak, koj škole moje zvršil jesem; vezda idem po svetu, da se negdi navčim, kaj jošče ne znam, negdi pak, kaj znam, pokažem. VUKSAN: (Dobro nam je došel, budemo imali z njim kratek čas; ar da bi kaj znal, bi bolje opravljen hodil.) Drago nam je, da se na takvoga namerili jesmo, od koga se kaj za hasen i napredek navčiti moremo. MATIJAŠ: Vse pomalo, vse pomalo; kuliko je moguče. SMOLKO: S tem bolje; - ako vi nam znamenje vašega znanja tak očivesto pokažete, da od vas suditi morali budemo, da vi po školah niste za nikaj hlače drli, ja vam jedne nove škornje dam zešiti; ar onakvem želim vsigdar pomoči, koji se trsiju z navukom nadomestiti ono, kaj njim po priprostoči roda i jalu sreče je pomenkalo. VUKSAN: I ja vam jeden menten podstavim i kučmu kapu prikažem. MATIJAŠ: Hvala velika. - Morebiti se pak pripeti, da ja komu kaj nepovolnoga bi včinil ali povedal, ar navuka mojega hasen ne stoji samo vu tom, da meni samo pomorem, nego takajše, da drugomu kaj hasnovitoga povem ali včinim. Ar navuki naši tam vsigdar ciljati moraju, da po njih ne samo skrbimo se za naše dobro, nego da i bližnjega ali od zla odvrnuti, ali na dobro vuputiti tak z rečmi kak s prikladnemi načini trsimo se. - Onda stoprav domovina čuti hasen navukov oneh, koje s tulikum srkbjum trsi se deci svoji po navučiteleh naprvo postavlati 3. I zato, ako ja morebiti kade vam suprotivnoga kaj bi včinil ali povedal, ne zamerite, ar istinu povedati i na dobro bližnjega vputiti dužen jesem. VUKSAN: To nikaj ni, prav je; i pravo imate, ar istina je jedna velika krepost. MATIJAŠ: S tem vekša, s kem se otprteje i segurneje poveda. SMOLKO: Gospone, vi z vašum istinum vezdašne vreme dalko ne zajdete, ar vam je vezda takov svet, da vam vu istini nikaj ne postavla, i onoga, koj istinu govori, zvekšinum bežiju i odurjavaju. - Još, još pri pomenšeh ima gde obeda, gde večeru, ali pri povekšeh i oneh, koj z drugemi kaj zapovedati imaju, niti ju pod krov ne pustiju, i ako se kak k njim zavleče, verujte meni, tak ju zmrcvariju, da ni jednoga cajnka celoga zmed njih ne odnese. - Kaj se nas nekojeh starinskeh Horvatov dotiče, mi ju jošče preštimavamo, ali naskorom bude nam i istini konec. MATIJAŠ: To je žalosno. - Komu anda bude veruvati, ako ne istini? SMOLKO: O, gospone, vezda, ki vam slatko govori, masno pripoveda, vse hvali, kaj se komu dopada: kudi, kaj ni po volji; koj se tam obrne, kam veter puhne; koj z vuki tuli, s cucki laje, z medvedi pleše, - on vam je človek ovoga sveta, pravičen, istinski i vsigde prijet. MATIJAŠ: Jaj meni, tak li je dalko vre odišla istina! SMOLKO: Vere tak dalko; dapače još dalje, kak bi mislili. - Ar poklam je Matijaš kralj vumrl, onda je i istina vu Vugerski zemlji zakopana. Zatem je čez deset let i vu Horvatski zemlji suhi beteg dobila, i tak dugo ginula i pogibala, doklam čez jedno petnajst let je 3 naprvo postaviti - predočiti, prikazati, predstavljati 7

zevsema preminula. - Nekoji sudiju, da nije zevsema preminula, nego da je samo zaspala; ali drugi govoriju, da su se pravdoznanci na nju negdi namerili, pak su ji oči skopali, da ne bi videla, kaj je pravo, kaj krivo; poklam su anda ovu oslepili, zgrabili su njejnu sestru Pravicu, ter su njoj oči zavezali, da i ona istinu ne bu videla, i zato vam vezda vse naopak ide, da zaisto ni moguče znati, kaj je pravo i kaj je krivo. VUKSAN: Gospon dijak, mort ste i vi zmed oneh mudrijašev, koji znadu oči skapati? MATIJAŠ: Moj prijatel, ako jeden, dva, ali više je hman ljudih, zato ni taki istina, da su vsi hman; kakti ako Smolkova žena pred tremi dnevi je obnorela, ter se na vrtu na hrušku obesila, ne moremo reči, da se i vaša žena na hrušku obesila bude. VUKSAN: (Zakaj sem pak nakanil vu mojem vrtu tu istu hrušku vcepiti?) SMOLKO (osupne se i k Vuksanu reče: Sused! ov človek mora vraga imati, ar zvan moje družine jošče nigdar nigdo ne zna za smrt moje žene.) - Otkud vi to znate, moj gospon dijak? MATIJAŠ: Ja iz zvezd i računov mojeh vsa zeznati morem. VUKSAN: Je li samo prešesna, ali morebiti i buduča? MATIJAŠ: Obodvoje, vse pomalo. VUKSAN: (Hočemo ga spitavati od prešesneh; ako ona zgodi, veruvati budemo mogli, da i buduča zna.) - Moj gospon dijak, je li bi vi meni kaj znali od mojeh prešesneh dnevov povedati? MATIJAŠ (pogledava v nebo, broji na prste i reče): Vi ste sin jednoga opančara; vu mladosti jeste jako duge prste imali i zbog toga vnogiput šibrani bili i komaj jeden put spod galgih vušli. - Posle ste postali krznar i s vsakojačkemi načini spravili lep imetek i silu novac, ali skoro vsaki tretji krajcar krivično; - vezda vas ljudi preštimavaju, kajti ste bogati, i gdje je sila, znate poglavarom z nekuliko žutaki jezike zavezati, da vam čez prste glediju; - vi pak ne marate bližnjega oguliti, samo da vsaki dan koju škudu ali žutaka vu zelni komori pod podsek zakopati morete. VUKSAN: (Je li mu sam peklenski duh za to vse povedal?) MATIJAŠ: Je li istina? VUKSAN: Tak, tak, ne čisto. SMOLKO: Sused, ni ga tja vu Samoboru malara, koji bi vas lepše zgodil. VUKSAN: Vnogo laže, vnogo. SMOLKO: Nikaj, ali čisto malo. - (Ja ga ne ču čisto nikaj od mene spitavati, ar da bi me načel, bi mi lasi na višak rasli). - Pokehdob znate, da se je moja žena obesila, bi li kaj od nje znali povedati? MATIJAŠ: Od mrtveh ali dobro ali čisto nikaj. - Ali s tem bolje od živeh. - Kakti, postavemo, da ste vi vu mladosti - SMOLKO: Dober i drečen bil. MATIJAŠ: Vu farni cirkvi - SMOLKO: Verno Boga molil i prodečtva poslušal. MATIJAŠ: Jednu punu ladičku penez - SMOLKO: Vzel i plebanušu odnesel. MATIJAŠ: Vkrali, odnesli i razbili. (SMOLKO, doklam Matijaš ova govori, kašla jako i srakuje se, da bi ga zaglušil). 8

MATIJAŠ: Da ste na Klancu na senjmu jednomu kožaru banko cedulu od 100 forinti - SMOLKO: Z drobnemi penez zmenil. MATIJAŠ: Drugomu pak torbicu s penezi - SMOLKO: K meni v srambu vzel. MATIJAŠ: Odrezali i odnesli. SMOLKO: Jesu mu, je, huncvuti tati, jednu kožu odrezali i odnesli; ja sem onda tam bil. - Vezda je pak dosta vašega znanja, ar smo dobro od vas vpučeni. VUKSAN: Vera, dosta dobro, ar se vezda tak dobro poznamo ja i Smolko sused, kak da bi pravi brati bili. SMOLKO: Ne bi li mi vezda jedno malo zagriznuli, ar je vre staro jutro i doba k ručku. MATIJAŠ: Ja ne bi maral, ar sem od snočka natešče. SMOLKO: Taki budem služil; jedno malo raspuznenca sira i k njemu češnjaka, k tomu dobroga staroga vina, k ovomu vsemu za začimbu par prijatelskeh rečih, čini prav tečnoga ručka. Metemtoga, doklam dojdem, posedete si. Spelanje III. Vuksan i Matijaš VUKSAN: Sedimo anda, dok Smolko dojde. - Gospon dijak, vi morate znači več, kak hruške peči. MATIJAŠ: Zakaj, moj prijatel? VUKSAN: Zato, kajti znate tak čisto do drožđih človeka shamati. MATIJAŠ: To vse čini mudroznanje, koje se z velikem trudom iz knig i vu školah zadobiva. VUKSAN: To je drugo; - tak ste vi drugač činili, kak vezda čine vnogi dijaki, koji ako čižme i opravu vu škole iduč dereju, vre se gizdaju, kak da bi celu horvatsku kroniku bili pozobali! MATIJAŠ: To ni dobro. - To čini, da ovakvi zlato vreme mladosti svoje za nikaj potrošiju i drugu hasen iz škol ne zneseju, kak vnogo kriča, malo vune. VUKSAN: Pak, gospone, k tomu su oholni i nepokorni zapovedjam i navučitelom. MATIJAŠ: Kaj se od ovakoveh domovina ima nadijati? - Ar koj vu mladosti ni se navčil pokoren biti, kak bude vu starosti znal druge ravnati? VUKSAN: Doklam sem ja detič bil, čul sem vnogi put na dijačkom pijacu takvoga kriča, da je ves varaš grmel; prvi put sem štimal, da se svade i vezda-vezda si v kečke pojdeju; pak su se vendar lepo mirno bliže poldneva vsaki k sebi razišli. MATIJAŠ: Prez dvojmbe jesu se onda dišputuvali. VUKSAN: Tak, tak, morebiti, da su došpituvali, ar su kričali kakti vrapci v jeseni po grmju. Ali vezda? - Vezda se došpituju po Harmici, po Vilici, med Grabami, i gdo zna, kud vse, i to bliže pol noči. 9

Spelanje IV. Smolko i prvi SMOLKO: Ovo je naš ruček. Prosim, gospon dijak, včinite se kakti doma. Sused, dajte, pomozite. - Pravo, kak vam je ime? MATIJAŠ: Matijaš. SMOLKO: Anda, gospon Matijaš. O, Matijaš je bil negda veliki kralj vugerski. Vitez i jako pravičen. - Sused, ne bi li nam pomogli jedno malo trošiti? VUKSAN: Hvala velika, nemam stanovito časa; pak sem i tak vre doma ručkal slivovu juhu z medom i z mlekom. MATIJAŠ: To je drugač kava, ali ju vi ne čete s pravem imenom krstiti. VUKSAN: Gospone, kava je kava, ali ovo, kaj su vezda počeli nekoji piti, je baš niš. MATIJAŠ: Kak to? VUKSAN: Poklam je kava podražela, zmislili su nekoji premogučni skupci vsakojački način kave; jedni opečeju čička, drugi kostanja, tretji nekakve zemelske mandale, ovi krumpira, oni merlina, nekoji žira, to si skuhaju kakti kavu i vputiju sami sebe i svoju mošnju, da je kava, ter to na tuliko, da su pripravni prisegati, da je takva kaluža tak dobra, žmahna i jaka kakti kava. Ali moja žena i druge purgarice jesu spametneše i ne dadu se vu to nikak vputiti, nego kupuju pravu kavu, makar po cekinu funt; samo su pak vu tom skupe, da samo 10 zrn na jednu šalicu brojiju, ar ne maraju, ako je kakti slivna juha, samo da je juha od prave kave. SMOLKO: To su ženski i dečinski oblizeki; po takveh črneh kalabužah je Horvatska zemlja na nikaj došla; nikaj jakosti, nikaj modzga, nikaj đeđernosti ni vu takveh obuzlivcev; drugač je to negda bilo, kada pri jednom knezu Vragoviču celo leto ni več potrošeno, kak jeden frtalj kave i pol frtalja cukora; ali zato pak je prpra, meda i staroga vina prez mere i vage potrošeno. Pak su bili onda ljudi čili, friški, zdravi i jaki kakti oroslani, ali vezda, poklam vsako jutro na posteli kavu srčeju, imaju slabe želuce, koji posne jestvine ne moreju kuhati: dobivaju glavne boli, omiljavice, zlate žile 4, i glediju van kakti smrti. Prav je to: o, da bi jošče jeden funt kave po 20 fl. bil, morebiti bi se povrnuli na negdašni način živlenja pređev našeh, i po tom mort na njihovu jakost tela i srca. - Nute, vzemite, sused. VUKSAN: Hvalim lepo, moram se domom paščiti, da kuliko prikrojim detičem, da mi manguvali ne budu. Zbogom, dober apetit. SMOLKO: Hvala. - Ne zamerete. Spelanje V. Smolko i Matijaš SMOLKO: Gospon Matijaš, vzemite više, pak ječte. MATIJAŠ: Ovo je vere dober sir i tečen. 4 zlata žila - hemeroidi 10

SMOLKO: Verujem to; ovakvoga mi vsaki drugi dan jedna baba iz Laščine nosi. - Dajteda ga zalete z ovum starinum. MATIJAŠ (pije): I ovo je zaisto dobro vino. SMOLKO: Ovakov je moj ruček vsaki dan. - Nekaj malo tvrdoga, da želudec ima kaj kuhati, i da bolje kuha, pridam jeden mecel ovakvoga zafriga, pak se nigdar ne tužim na težine, 5 glavne boli, zlate žile, ali na griz i krč želuca. MATIJAŠ: To je vera istina, ar s kem bolje mi našega želuca prokšimo, s tem bolje njega slabemo i on nas bolje bantuje. SMOLKO: Kaj štimate, kuliko ja let imam? MATIJAŠ: Okolu 50. SMOLKO: Oho! vre imam 65, pak vendar jošče nisem nigdar betežen bil zvan onda, kad su me dijaki stukli pri Svetom Ksaverijušu. MATIJAŠ: Zakaj su vas tako jako stukli? SMOLKO: Gospone! tak su me stukli, da sem štimal, da ni jedna kost vu meni ni cela ostala, i to baš za niš. Ja iduč z Bistrice, na sam Ivanski navečer jesem se pri Svetom Šimunu jedno malo napil, i več vu mraku domom iduči došel sem do Svetoga Ksaverijuša, kade me je vino premorilo, i onde pri dolneh velikeh vrateh pod graberjem ležem i zaspim; okolu pol noči prebudim se i čujem ne dalko od mene pod onem velikem pilom ze vsum močjum kopati; zdignem glavu i spazim, da jedno tri z motikami verno delaju, i taki mi na pamet dojde, da moraju peneze kopati: zdignem se anda, počnem beketati, tuliti i ručati 6, da je prestrašim; ali i oni mene spazili jesu, dodrčiju do mene, preobrneju svoje motike, počneju po meni nabijati, da sem komaj pobegel, i tak su me onda prestrašili, da sem prisegel, da nigdar više nikoga ne budem plašil. MATIJAŠ: Pak, kaj sudite, jesu li kaj skopali? SMOLKO: Toga ne znam, ar nisem više tri tjedne časa imal s postelje ziti i kada sem vre k sebi došel, smrdelo mi je više frtalj leta tam iti; potlam vendar videl sem, da je jedna velika jama onde bila i znamenje ostalo, kak da bi jeden lonec nutre bil ležal. MATIJAŠ: Pak vi to verujete? SMOLKO: Kak ne bi? - O! kuliko ih je, ki su kopali i vu ris hodili i bogati postali. MATIJAŠ: Za skopati peneze, jošče morem veruvati, najmre da se gdo na nje nameri; ali gdegoder, pod kakvemgoder pilom 7, hruškum, vuglom ali drevom, i on bi norc bil, ki bi zakopal, i on drugi, ki bi iskal, ako barem na pol ne bi bil seguren; ali da je gdo od vraga v risu peneze kada dobil, toga nikak veruvati ne morem. SMOLKO: Verujte, gospone, ja vam sam poznam jedno tri, kojem su poleg toga i lasi opuzli z glave. MATIJAŠ: Čul sem i ja takve vnoge pripovesti, ali ove veruvati nikak ne morem. Ar vrag prez božjega prepuščenja sam po sebi nikaj ne more. Ako bi anda Bog dopustiti hotel, da človek od vraga peneze dobi, zakaj mu ne bi sam hotel dati? Drugoč: ovakov, koj bi na ovakov način peneze dobil, sam sebe ne bi nigdar prepovedal, ar je nad tem velika kaštiga; drugi pak povedati ne more, zvan iz sumle, koja je retkokrat istinska. 5 težina - mučnina 6 ručati - rikati 7 pil - stup 11

SMOLKO: Kakgoder je, ja vendar verujem, da je moči ovakvem načinom penez dobiti. MATIJAŠ: Ako hočete, morete probuvati: mort i vi srečni postanete. SMOLKO: Ja bi stanovito hotel probuvati, samo da bi vse prav znal, kak se mora pri tom baratati. MATIJAŠ: Ja vam morem ves način povedati, kak sem ga ja čul, ali ne stojim dober 8 za njega, da je istinski. SMOLKO: Prosim vas, povečte mi, mort da je jednak z onem, kak sem ja čul. MATIJAŠ: Pokehdob anda hočete, povem vam. - Najprvič mora jeden ali više, samo ne na par, segurni i nestrašlivi na Mlade Nedelje navečer, na jednom križanju putov ob jedenajsti vuri po noči sebe do rubače i gač sleči, potlam na istom križanju z jednem palašem okolu sebe kolobar opkružiti i trikrat zafučknuti; na kaj dojde vrag i opita, kaj hočete, i vi mu odgovorite, da bi radi od njega penez imati, koje vam on obeča, ako predi ufate se podnesti strahe, koje on na vas pošiljal bude; i kada vi odgovorite, da hočete vse strahe podnesti, onda on počne z vsakojačkemi ognjenemi peldami vas plašiti; vi pak ne smete niti peden mesta zvan risa ziti, ar bi vas odnesel. Kada ste vre vse strahe izbavili i dvanajsta vura dojde, onda pokaže se vrag i opita vas, kuliko penez imati hočete, vi pako morate povedati; ali samo neparnoga broja, i tuliko, kuliko ste zaprosili, vam da, kaj potlam slobodno domom odnesete. SMOLKO: Tak sem ravno i ja čul, samo toga ne, da se do gač i rubače bi sleči moral; metemtoga i ovo se lahko včiniti more, samo da su k tomu poslu potrebni, koji su dobro segurni i neplašlivi, da ne bi profunta domom donesli. - Je - gospone, mi smo poleg našega razgovora vre zdavnja našega srablivca spraznili. Prosim vas, potrpete malo, ja taki nazad dojdem. Spelanje VI. Matijaš To je istina, da ni bedastoče niti hmanjice, vu koju se ne bi dal človek vputiti za volju penez. - Ov priproščak dobro more videti, da je to kriva vera, jedno lažlivo i vkanljivo ufanje; metemtoga vendar on bi predi Boga zatajil, kak se hotel dati vputiti, da ovo ni istina. - Ali ja budem na njega dobro pazil, i ako se podstupi ovo probuvati, tak ga splatim, da mu nigdar više ovakov način penez dobiti na pamet ne dojde. 8 dober stati - jamčiti 12

Spelanje VII. Smolko i Matijaš SMOLKO: Ovo jošče jeden srablivec i to nam za ruček dosta bude. - Nate, pite! MATIJAŠ: Hvala velika: meni je jedna kupica prek dosta. SMOLKO: No samo jedno malo jošče. MATIJAŠ: Naj bu, za vašu volju (pije malo); vezda vam pak hvalim na vašem ručku i ne zamerite, da se ne morem z vami duže spominati, ar imam jošče dosta posla. SMOLKO: No, srečno, moj gospon Matijaš, - hvala vam na spomenku. Spelanje VIII. Smolko Vezda znam ves način, kak se mora baratati, kada gdo hoče v ris iti. - Ovo je fini mudrijaš; on toga ne veruje. - Mora i on zmed oneh biti, koji nikaj ne veruju, nego kaj s tacami 9 zgrabiti mogu. Ali se ja ne morem vputiti vu to, ar su mi vnogi istinski ljudi povedali. Zato hoču si ja jošče moje dva detiče z menum vzeti; oni su kakti oroslani, koji bi se mogli vsaki z srednjem vragom hitati. Ovi budu najboljši, ar se ništa ne znaju bojati; z ovemi ja prvu Mladu Nedelju pojdem na jedno križanje. - Lazo, Gajo! Spelanje IX. Smolko, Lazo, Gajo, detiči OBADVA znutra govore: Što je, gazda? SMOLKO: Hote amo. OBADVA vane: Što je? SMOLKO: Ja bi ništo s vama govorio, ali vi morate šutit. OBADVA: Baš kano kamen ali drvo. SMOLKO: Mi ćemo tražiti novce. LAZO: Kudaj? GAJO: Od koga? SMOLKO: Od vraga. MATIJAŠ (odzad s kuta luče, posluša i reče): Nadijal sem se ja toga. 9 taca - štap 13

LAZO: Jesi mu posudio? SMOLKO: Nisam, veće da on nama svoje dade. GAJO: Ta imade li on novaca? LAZO: Budalo, kako ne bi imao, kad tuliki bogatci k njemu odlaze. GAJO: Ali ništa ne dovedu. LAZO: Ali mu kažeju, kadi su svoje novce zakopali. GAJO: To može biti. SMOLKO: Indi vidite, da on imade novaca. LAZO: Kako? - Silom ali molbom? SMOLKO: Čekajte! Povite vi meni, je li se možete šta uplašiti? LAZO: Baš ništa, na moju vjeru, van stare babe, i to u mraku iznenada. SMOLKO: Tote ne ima straha. Veće je li bi se uplašili vraga? GAJO: Idi, Boga ti, tko bi se onoga gurzusa uplašio. SMOLKO: Već, ako ti dojde kano ognjena zmija, da te vujide? GAJO: Za vrat s nadžakom. SMOLKO: Ali kano vatran zmaj, da te poždere. LAZO: U vrh glave. SMOLKO: Indi dobro. - Mi ćemo sad u noć prve Mlade Nedile prije jedanajst sata izlaziti tamo na Prekrižje i ondi na krišputu ćemo vraga zazvati, neka nam jedanajst hiljada cekinov dade. MATIJAŠ: (Dobro da znam, kam budete došli: splatim vas tak, da se budete do smrti spominali iz vaše koraže). SMOLKO: Prije kako ove novce dobijemo, hoće nas plašit; veće mi se na to ne krenemo, manje pako iz kola izlazemo; posle će nam novce dati. LAZO: Makar šalje nad me hiljadu vragova, baš mi se ne krene ni jedan las na glavi. GAJO: Ala, branjo, lipe sriće! - Silu novaca, baš za niš. - Ma kako ćemo dilit? SMOLKO: Budalo, kako? Meni polak, vama dvima polak. GAJO: Ne može tako biti. SMOLKO: Zašto ne? Nisam li ja gazda? GAJO: Jest, kod kuće, ali kadi se jednako strahi dile, valja da se i novci dile. SMOLKO: Ma valja da na stariju bradu više padne. LAZO: Pravo imadeš; ti si uzmi tri strani 10, ja ću dvi, ovaj pako jednu. GAJO: Ta kako bi ti, gurzuse, dvi strani dobio, a ja jednu? LAZO: Valja da je moja brada starija. GAJO: Makar bila starija od Kraljević Marka, to ne ima ništa. Kadi se zajedno radi, valja da se jednako plaća. LAZO: Čuti, Boga ti, ne zaprdaj. GAJO: Ja ću tebi šutit? Tko si ti? 10 stran (ž. r.) - dio 14

LAZO: Sad ću ti kazat, tko sam. GAJO: Gurzus, drugo ništa. LAZO (šupi ga za vuho i reče): Baš nešto više. GAJO (šupi njega i reče): I ja toliko. LAZO: Počkaj, (prime ga za lasi) ćemo vidit, tko će više dobit. GAJO (prime ga takaj za lasi): Svaki mora jednak dobiti. (Doklam se ovi dva sim tam za lasi navlačiju priskoči SMOLKO i reče): Što budalite, živina? Zašto se prije čupate, kak novce imate? Ustran, gursuzi! (Onda pak obodva se njega primeju i počneju ga za lasi natezati i reče) LAZO: Hoćeš polak imat? GAJO: Hoćeš tri strani? SMOLKO: Nemojte, budale, svakomu jednako, svakomu jednako! Puščajte! (Pustiju ga obadva). LAZO: A tako je pravo. SMOLKO: Baš pravo; svaki jest dobio jednako, valja da i novce jednako dili. GAJO: To valja. Sad idemo radit. Spelanje X. Smolko Ala prav sem k vremenu na del došel, vsakoga je jednako dopalo. - Ha, ha, ha, kakvi smo mi tri norci bili, - poskubli smo se i potukli za novce, koji su jošče vragu v klampleh. I morebiti onda ovak, ali gorje na del dojdemo. Ha, ha, ha, prav mi je bogme, zakaj sem takov osel bil. - Ne beše mi se med takve bedake mešati, bil bi cel ostal, ar govore Horvati: ki se med poseje meša, da ga, z dopuščenjem govoreč prvič, drugoč i tretjič - i svinje pojedu. 15

DOGOD II. Spelanje I. Smolko Komaj se denes vre tretji tjeden s postelje zvlekel jesem, ar sem ves tak zmlačen i spotrt, da se komaj giblem. - To imam hasen od moje koraže. Prav je meni povedal Matijaš dijak, da od vraga peneze prositi je velika bedastoča, ar kaj sam nima, ono dati ne more. Ovu istinu jesu dobro počutila moja pleča, ar me je na mesto penez celu vuru s korbačem nemilo vordašil. To imam i drugo nikaj. Spelanje II. Jugovič i Smolko JUGOVIČ: Dober dan, moj sused, kak ste vi? Kak vas Bog pomaže? SMOLKO: Na službu; vsaki dan bolje. Naj si sedu, prosim. JUGOVIČ: Hvala velika, ja nerad sedim, niti časa imam, ar tuliko imam posla, da ne znam, gde mi glava stoji. SMOLKO: Verujem ja to, ar ovak mlada gospoda, kada se domovini na službu alduju, ni jednoga hipa ne zamudiju, svoju vernost i prikladnost 11 očivestu pokazati. JUGOVIČ: To drugač ne more biti. Zvrhu toga velika gospoda vsa me rada imaju, i zato svoje osebujne posle meni na tuliko zaufaju, da komaj jednoga zvršim, vre me deset drugeh čaka. Prosim vas, da bi mi jeden par z najfineše kože čižmih zešili, ali jako lepe, naprvo velike špice, odzdola prešite i čisto k nogi. SMOLKO: Ja vre znam, kak su čalarna mlada gospoda: ja vnogem šivam i zato sudim, da i oni budu z menum zadovoljni. JUGOVIČ: To mi bude jako drago. 11 prikladnost - sposobnost 16

Spelanje III. Matijaš i prvi MATIJAŠ: Dober dan, moj prijatel, kak ste? SMOLKO: Dobro, moj gospone, vsaki dan bolje. MATIJAŠ: To me kruto veseli. JUGOVIČ: Kaj to zvoni vu farni cirkvi z velikem zvonom? SMOLKO: Bude blagoslov i popevana maša. JUGOVIČ: Zakaj? Vem denes ni svetek? SMOLKO: Ni svetek, ali je takva navada, da ljudi barem jednu vuru vu ovi halabuki Bogu alduju. JUGOVIČ: To vera, niti je spodobno niti prilično, vu ovakveh dneveh pobožnosti zmišlavati, kada vsi ljudi zmešani jesu. MATIJAŠ: Prosim, ne tak! Ar jesu ljudi, koji si znadu dati razloga: Bogu nekuliko vremena i svojemu veselju nekuliko. JUGOVIČ: To nejde skupa, ar se i pobožni i nepobožni bludiju. MATIJAŠ: Niti jedni niti drugi, ar vsaki zna, kaj činiti mora. JUGOVIČ: Zato je včera nedelja bila i onda je vsaki svoju dužnost včinil; denes svetka ni, anda niti zapovedi. Ako pak zapovedi ni, tak ne bi se s takvem glasom ov dan obslužavati moral. SMOLKO: Včera je svetek bil i dan zapovedi, pak ste ga vendar vi z vekšem glasom i halabukum od snočka devete vure do denes pete zbavili, neg ste včera samo pol vure v cirkvi pobožno zbaviti hoteli; ako vam božja služba več neg pol vure trpi, vre vam je vu cirkvi dug čas, akoprem i onda več šepčete i sim tam se zgledavate neg Boga molite: pri službi pak vražji ne marate sedem i osem vur potrošiti i to vam je jošče premalo. JUGOVIČ: Ja protesteram: na balu biti ni vražja služba, ar se tam vredna i poštena gospoda shađaju. MATIJAŠ: To je istina. Ali ako vzememo, otkud ta navada bala dohađa, misliti budemo morali, da na njem ne mora zevsema dostojno iti. Ar Baal je bil negda krivi bog, koj se je drugač zval Molok pri Amonitanceh; ov bil je i samoga brunca zlejan, s telečum glavum, i tak velik, da vu njegovom trbuhu mogel se je veliki ogenj naložiti, i tulike požirake je imal, da čez nje deca od pet ali više let mogla su prelesti. Ovomu anda bogu stareši z veseljem alduvali jesu vsako leto stanoviti broj dece svoje, koju aldovniki po redu čez lampe bolvana metali jesu, i da se plač njihov ne bi čul, z velikem kričom, bubnji i piščalmi okolu bolvana jesu plesali, doklam se i ogenj i bolvan je zasitil. JUGOVIČ: Pak, kaj se imamo s toga vučiti? MATIJAŠ: Ako ne zevsema jednaku, barem nekuliko prispodobnu istinu. - Bolvan ov Baal je mesto opčinskoga veselja; vu trbuhu njegvom gori ogenj vsakojačkeh tela nasladnosti; vu ov ogenj peljaju vnogi stareši decu svoju, koju, akoprem ne hotomce, vendar priliku dajuč alduju ovomu bolvanu, kojemu vnogi drugi jednakem načinom aldove svoje na pogibelj poštenja, sramežlivosti i čistoče dragovoljno nosiju; ovem pako vsem, za nutrnja spoznanja čisto podušiti, jesu na strani oni aldovniki, koji z svojemi zaglušlivemi mužikami na tuliko vse skupa zaglušiju, da niti čuju niti vidiju, kaj se dela. JUGOVIČ: Poleg vsega toga moči se je tam pošteno zadržavati. 17

MATIJAŠ: Nekojem i jako spametnem, dopuščam. Ali prosim, kaj moremo od oneh suditi, koje vidimo, da se vu isteh sveteh mestah nedostojno zadržavaju? Je li se oni vu ovakveh mestah dostojneše i pošteneše zadržavati budu mogli? JUGOVIČ: Pak, gdo ste vi, prez zamere, koj se podufate ovakva govoriti? MATIJAŠ: Ja sam dijak, koj moje škole zvršil jesem i po svetu iščem mesta, kade se med ljudi dobroga držanja nastaniti budem mogel. JUGOVIČ: O, bene, bene, ergo domine studiosus. 12 MATIJAŠ: Ita profecto. 13 JUGOVIČ: Prez dvojmbe primae classis in omnibus scholis? 14 MATIJAŠ: Eminens. 15 JUGOVIČ: A, to je lepo, to je hvale vredno. Ako morem vu čem pomoči, drago mi bude. Ja sem vu velikeh hižah znan: ako bi kam za ključara ali pisara, ako znate lepo pisati, hoteli preporučeni biti, ja vas segurno hoču preporučiti. SMOLKO: Gospone, najte si glavu treti, ov sam sebe več kak za pisara preporučiti more, ar ga na cente ima ovdi (pokaže na čelo). JUGOVIČ: Ne bi sudil. SMOLKO: To morete lahko zeznati, ar on vam je takov človek, koj iz računov i zvezd vsa prešesna i buduča zeznati more. JUGOVIČ: To ni moguče. Ar sem i ja po školah hodil, pak toga ne znam. - Metemtoga, domine studiose, kaj bi od mene znali povedati? MATIJAŠ (pogleda v nebo i broji na prste): Malo dobra, ne zamerite. Vi ste od plemeniteh i premogučeh starešeh. Kakti dijak bili ste vsigdar v tretjem redu; tukli se, razbijali i poleg vsega toga gizdavi bili. Gledeč na roditele vaše puščeni ste po školah iti, ar je znano bilo navučitelom vašem ono opčinsko premogučeh starešeh govorenje: da deca njihova, akoprem nikaj znala ne budu, vendar ostaneju roda i plemena poglavitoga. Zato pustili su vas ovak odrasti s praznum glavu, ar se od ovakveh male, ali nikakve druge hasne domovina ima nadijati, kak da broja povekšaju oneh, koji njoj na trh i nikakvu diku jesu. SMOLKO: Gospone, ov vam po vražje zafrigava. JUGOVIČ: Zgađa nekaj, zgađa. MATIJAŠ: Kada ste škole zvršili i počeli sablju pasati, onda nigdo oholneši, nigdo obzojneši od vas nije bil. Oprave, komedije, bali, pileari, vsi su vas puni bili, da vre stareši vaši nemoguči zmagati prestali su na vas trošiti, otkuda počeli ste duge delati na buduče vaše očinstvo. JUGOVIČ: To drugač ni, ar bi stareše moralo sram biti, da bi sin njihov rastrgan i razdrapan hodil. SMOLKO: Ne, gospone, ne, nego bi nje sram biti moralo, da su ovakvu potiru hiže i plemena svojega othranili i odrasti puščali, ter za mlada nisu zla nagnenja vuzdali i k dobru privučali. 12 O, bene, bene, ergo domine studiosus (lat.) - O, dobro, dobro, dakle gospodine student. 13 Ita profecto (lat.) - tako zaista 14 primae classis in omnibus scholis (lat.) - prva klasa u svim školama 15 eminens (lat.) - izvrstan, odličan 18

MATIJAŠ: K tomu od gizdosti hodite od jedne do druge velikašev hiže, pak ako se samo s hausmajstrom kade spominate, vre se pred drugemi dičite, da ste pri jednom ali drugom velikašu vu osebujnom poslu bili. Zadnjič dobili ste volju oženiti se, da ovak peneze, ne pak ženu dobite. I kajti se ni jedne vredne dobiti ne ufate, ar su vre vsem vaši vetri, čalarnost i praznost glave znana, zato (reče mu vu vuho) radi bi zaslepiti Vuksana krznara za njegovu kčer, ar je jedina i bogata. - Je li nimam pravo? JUGOVIČ: Ovo najzadnje na tuliko, da moram suditi, da ne samo prešesna, nego i buduča vam znana jesu. MATIJAŠ: Vse pomalo, vse pomalo. JUGOVIČ: Prosim vas, moj prijatel, potrudite se jedno malo k meni, da se nadalje od toga z vami spomenem. - Ne zamerite. Spelanje IV. Smolko Ovi dva moraju jako veliku skrovnost imati, da je on njemu nekaj vu vuho prišepnul, ov pak onoga k sebi otpeljal, da se leže 16 skupa spomeneju. Jedno malo bi želel znati. Ali naj bude: od mene, sudim, da nikaj ni, a drugo si pak glavu treti bi bedasto bilo. Ar sem i tak srečen, da vsigde dobro nadojdem. Idem ja rajši tomu dijaku obečaneh škornih krojit: bude spametneše, kak si za malo dobra glavu treti. Spelanje V. (Jugovičeva hiža) Jugovič i Matijaš JUGOVIČ: Vi ste mene tak zmalali malo predi, da bolje ni moguče samomu meni mene poznati; i zato želel bi ja vas vu tom poslu na moju ruku imati i da bi vi meni Vuksana za njegvu kčer nasnubili; ar ako nju ne dobim, da se z dugov kuliko skopam, budem zdvojiti moral. MATIJAŠ: Ovo je težek naruček, ar Vuksan je človek tvrd, skup, svojevolen i k tomu jako vu svoje bogatstvo zaljublen. JUGOVIČ: Ali vi znate i morete znajti načina ovo njemu dopovedati. MATIJAŠ: Iskati načina morem, ali znajti je sreča; ar volju človeka, kam bi hotel, obrnuti, niti znanje niti jakost imam. Metemtoga za volju vašu tental budem vse načine. 16 leže (komp. od lehko) - lakše 19

JUGOVIČ: Ako mi to opravite, vekovečni pri meni kruh i opravu imali budete. MATIJAŠ: Na jednom i drugom hvala. Ja nikaj za plaču, nego za volju i hasen činiti navaden jesem. JUGOVIČ: O, da bi mi moguče bilo mišu biti, kada vi z njim od toga posla govorili budete, rajši bi neg ne znam kaj, ar sem jako željen sam čuti, kaj da govoril bude. MATIJAŠ: Vu tom bi vam predi pomoči mogel, kak obečati, da vam povoljnoga kaj opravim. JUGOVIČ: O, dragi prijatel, prosim vas, dajte mi povečte. Meni dosta bude, samo da sam čul budem, kaj od mene misli i kak govori, da se potlam ja po tom ravnati mogel budem. Dajte mi povečte, ako kakov je način moguči. MATIJAŠ: Ne znam - meni se vidi (iščuč okol sebe travu govori), da jošče imam jedno perce od one trave, koja človeka neviđenoga čini. JUGOVIČ: O, dragi ljubleni prijatel, dajte mi, ako imate, ja vam na veke zahvalen budem i vas več kak za proroka držal. MATIJAŠ: Ovo je ravno jošče jedno perce; ovo se mora pod jezikom držati onde, kada hoče gdo neviđen biti, i na miru vu jednom mestu ostati, niti se z mesta gibati, ar drugač ne vas nego vašu tenju bi človek spazil i ovak vsa norija bi se pohabila. JUGOVIČ: Budite segurni, da vam ja kakti cepec na mestu stal budem. MATIJAŠ: Anda dobro. Ovo vam je: čuvajte ju dobro i kada Vuksan sim dojde, friško ju pod jezik postavete i vu jeden kut stanite. Verujte meni, da vas videl ne bude. JUGOVIČ: Gda pak on sim dojde? MATIJAŠ: Ja vezda taki idem k njemu i budem ga prosil, da čez jednu vuru k meni dojde, vi pako morate jedno malo pred njim k meni dojti i onda vam se želja spuni. (Odide). JUGOVIČ: Ovo je jako lepi način čuti, kaj drugi govori, i videti, kaj čini. Sreča, da ovakva skrovnost ni vnogem znana, ar kuliko bi nekojem hasnela, tuliko i sto puti više bi drugem škodila. Vezda idem po mojem poslu, da i ovoga zvršim i drugoga ne zamudim. Spelanje VI. (Matijaševa hiža) Matijaš, potlam Vuksan MATIJAŠ: To je istina, da je ovo jedna prazna glava, i jedna zmed oneh, koji su vnogo po školah trošili i malu hasen iznesli. I ovo je jeden zmed oneh, koj drugač nikaj ne veruju, doklam po njihovi volji vsa ideju, ali kak brže se vreme i sreča obrne, pripravni jesu vu vsaku bedastoču sebe napeljati dati, samo da kakovu od onud hasen čutiti mogu. Ov je tulikajše takov, ar se čisto lehko vuputiti je dal, da more po jedni travi neviđen postati, kajti ga sila pritišče i vu tom polehčicu najti ufa se. Ali splatim ja njega tak, da nigdar više takvem bedastočam veruval ne bude. VUKSAN: No, ja sem ovde, gospon dijak. 20

MATIJAŠ: Najpriličneje ste došli, moj sused. VUKSAN: To mi je jako drago, ako sem potreben i morem služiti. MATIJAŠ: Mala služba, ali velika norija. VUKSAN: Čisto dobro, ar sem ravno vezda na norije jako prikladen, ar sem se v Kaptolomu takvoga dobroga staroga vina napil, da mi vse žile igraju. Sudim, da ovo mora jošče od onoga vina biti, kojega su negda Krajnci zvali erdegata bajn. MATIJAŠ: To mi je još dragše, da ste tak zevzeti na norije; hočemo i mi jednu imati. VUKSAN: Kak se zove? - Van z njum. MATIJAŠ: Jugovič prosil me je, da bi vas snubil, da bi mu vašu kčer dali za tovarušicu. VUKSAN: Nigdar bedasteše ni mogel misliti. MATIJAŠ: Kajti mi pak nikak mira ni dal, moral sem mu obečati, da vas na to snubiti hoču. K tomu željel je sam poslušati kaj vi vu tom poslu govorili budete, i ja sem ga vputil, da imam takvu travu, koju pod jezikom držeči neviđen postane. Ovu od mene je vzel; zato kada on vu hiži bude, tak se držete, kak da ga videli ne budete, i na vse moje reči tak odgovarjajte, da bu dosta šnofati imal. VUKSAN: Nigdar lepše komedije. Verujte meni, da ga tak splatim, kak se zna i valja. Gda pak bude ta komedija? MATIJAŠ: Vi vezda mahom domom odidite i čez pol vure nazad se povrnite: za toga on vre pri meni bude i onda počnemo našu igru. VUKSAN: Ako vezda ne pokažem, kaj sem ja, tak nigdar drugda. Idem brže domom, da ze vseh mojeh ladlnov zberem, kaj god je gde pameti, da ju ovde skramariti mogel budem. Ha, ha, ha, nigdar lepše norije. Spelanje VII. Matijaš Ovu vuru jesem dobro navil: kada se spusti, bu išla, tukla i bila, da bu dragota poslušati. Vezda nikaj ne fali, kak onoga gimplna k rukam dobiti kaj brže. - On ne sfali drugač, zvan ako je vre kade travu probuval i spazil, da je vkanjen. - Skoro da sem bedasto včinil, da sem mu nju pred vu ruke dal. - Dobro je, ono ide sim. Ovakve veternjake človek more vu vse vputiti. 21

Spelanje VIII. Matijaš i Jugovič JUGOVIČ: Malo je falelo, da ni sem zakesnil. I bil bi morebiti, da sem se ni paščil pri gospodinu Smukoviču nekaj skrovnoga kaj brže pisati. MATIJAŠ: Ravno prav i dobro ste došli, ar se naskorom nadijam Vuksana k meni. JUGOVIČ: O moj dragi prijatelj, ja se vre vezda veselim, kak ja v kutu stal budem i on mene ne bude videl. MATIJAŠ: Ja tulikajše komaj čakam, doklam jakost moje trave vi čutiti i ja videti mogli budemo. JUGOVIČ: Kulika budem ja mogel po jakosti ove trave čuti, videti i zeznati. O! ova meni jošče takvu sreču zrokuvala bude, da njoj moji pajdaši i prijatelji nenavideti budu morali. MATIJAŠ: Vse pomalo, vse pomalo; nikaj nagloga nima konca dobroga. (Spazi Vuksana i reče:) Ide, ide Vuksan, friško travu pod jezik. (Jugovič dene pod jezik travu, Matijaš se pak včini, kak da ga ne bi videl i reče:) Gde ste? - Tam v kut stanete, pak se niti ne genete, doklam on ne odide. Spelanje IX. Vuksan i prvi VUKSAN: Dober dan, gospon dijak. MATIJAŠ: Dober dan, dragi sused. Drago mi je, da ste se k meni potrudili, da se med četeremi očmi spomenemo od jednoga dugovanja, koje vam i drugem dvem veliku sreču doprinesti more. VUKSAN: O! gospone, gde se kakva sreča vloviti more, onde sem ja ze vsemi četiremi pripraven. MATIJAŠ: S tem bolje; anda se ufati morem, da vu poslu mojem napreduval budem. VUKSAN: Samo van z njim brže, ar sem denes na vse pripraven. JUGOVIČ: (Dobro je ufanje; ako mu ov z nosom ne zavine, ne če mu drugi nigdo.) (Doklam ova Jugovič mučeč i kakti vu sebi govori, Vuksan na njega plune, nato reče i pak mučeč:) JUGOVIČ: (Ala prasec nekakov, pak je ravno na me moral plunuti.) MATIJAŠ: Anda dobro. Gospona Jugoviča, ne dvojim, da dobro poznate. VUKSAN: Ako ga vsaki kučiš pozna, pak ga ja ne bi poznal. MATIJAŠ: Ov drugač od poglaviteh roditelov, vezda kakti na vsu ruku živuči, nakanil je sreče svoje stališa pobolšati. VUKSAN: I vreme bi mu bilo jedenput; ali bi skupa pamet i držanje moral pobolšati, ar zaisto ves, kulik je, ni šnof duhana vreden. MATIJAŠ: A, toga ne govorite, on je vendar plemenitoga roda. 22

VUKSAN: Kaj hasni plemenščina, ako niti Bog niti kralj niti domovina iz njega hasen kakvu imati ne more. - - Plemenščina je prazno ime samo, koje niti hrani niti opravlja človeka. - Srce plemenito, držanje drečno, navuk potreben, prikladnost k službam domovine i marlivost, ova su, koja istu plemenščinu plemenitu činiju. MATIJAŠ: Ali se on vendar čini prikladnoga, ar s vremenom bude jošče dober prokurator. VUKSAN: No, toga nam je potrebno jošče, i tak je teh prisežnikov, pisarov i pravdoznancev tulika sila, da nimamo skoro mesta, kam bi plunuli. - Pak, kaj bi on za jeden prokurator bil, koj jošče porkuš juruš niti za rep ni prav prijel, niti morebiti zna dobro scribo cum calamo. 17 MATIJAŠ: Kak je goder. On je vendar želju i volju dobil oženiti se i ovak svoj stališ pobolšati. VUKSAN: To jest iz slame leči v koprivje. Prosim ja vas, koja bi njega vzela drugač, zvan ako bi mislila, da se od njega poleg vezdašnje navade, kojoj se jako čez prste gledi, kada ji se videlo bude, svojevoljno raspitati mogla bude. (Plune na Jugoviča.) MATIJAŠ: Ja vendar sudim, da bi vnoga plemenita divojka k njemu privolila, ar je lepoga tela, poglavitoga roda i bogateh starešeh. VUKSAN: To je sve prav. Lepo je telo, ali je na njem gingava i prazna glava. - Poglavitoga je roda, ali ovoga z svojem držanjem tak je vre zahrđavel, da mu je komaj pridovka poznati. Bogateh je starešeh, ali je vre jednu polovicu duga vu buduče očinstvo napravil; drugu polovicu lahko rastepe vetre delajuč, kopove i jagare zdržavajuč, jahače hraneč i tak dalje. (Plune na Jugoviča.) MATIJAŠ: Ali ako divojku dobi, koja premoguča bude, lahko vse duge splati i dostojno živeti mogel bude. VUKSAN: Koja je pak ona, koja, ako je premoguča, ne bu tulikajše potrebuvala takvoga, kojemu, kaj vu mošnji falelo bude, v glavi barem ne sfali. (Plune na Jugoviča.) MATIJAŠ: Postavemo, da bi mu se vaša kči dopala; vi ste bogati, ona jedina, bi mogli sebe i nju srečnu včiniti. VUKSAN: Gospone, kaj ste obnoreli, ali z mene norca imati hočete? MATIJAŠ: Niti jedno niti drugo. Nego to je prava istina, da se njemu vaša kči na tuliko dopada, da je dokončal nju od vas po meni prositi dati. VUKSAN: Da bi se ja komu vu to vputiti dati hotel, bi vekši norc moral biti, neg je on sam. (Plune na Jugoviča.) Ar, kaj štimate, da on moju kčer, ne pako moju mošnju snubi? O, znam ja dobro takveh habikruhov nakanenja; komaj iz škol izideju, komaj jedno malo počneju scribo cum calamo, 18 vre misliju, da bi koju divojku kade zaslepili, ter se z njenjem blagom oženili, da bi ovak na bale, pileare, holber cvelfe, alamude oprave više trošiti imali. I zato, ako nikaj više nimaju, kak one duge hlače, koje ober pupka vežeju, vre se zgledavaju, da bi kakvu bogatu dobili. Ali za dobru, tihu gazdaricu, ako i pri malom imetku, retki pitaju. Gde bi se pak tulike bogate zmagale, ako bi vsakomu na del jedna dojti morala? - Ovakvi založaji jesu retki, pak su i za one, koji v glavi i v mošnji soli imaju. (Plune na Jugoviča.) 17 scribo cum calamo (iskv. lat.) - pisati perom 18 scribo cum calamo (iskv. lat.) - pisati perom 23

MATIJAŠ: Ja ne sudim, da bi se vi ufali vašu kčer komu vekšemu i preštimanešemu vdati, pokehdob je purgarskoga roda i priprosto zvučena. VUKSAN: Kaj? Priprosto zvučena? Prosim za oproščenje. Hodila je ona tri leta nad Kamenita vrata; navčila se je tam štrikati, jedno malo šivati, z vsakojačkum svilum srca našvavati, tak da su v jednom tri; katekizmuša zna tja do glavneh grehov; pisati zna čisto dobro, samo da si priteško čteje. Vsega zna dosta dobro, samo presti malo. (Plune na Jugoviča.) MATIJAŠ: To je dosta za purgarske kčere. VUKSAN: Pak, kaj štimate, da bi taki Jugoviča vzela, da bi srečna bila? MATIJAŠ: I kruto: bi postala plemenita; bi se z vekšemi pajdašila; navčila bi se vludneši način živlenja. VUKSAN: Najte, najte, prosim vas, te sreče brojiti. Imamo žive pelde takveh, koje se iz purgarskoga stališa med plemenite zakrpale jesu, kak živeju, kak se nosiju, kak se prenavlaju, kak da bi s porcolana bile. Od gizdosti rastežu se jeden klafter dalje, kak se s poplunom odeti mogu; od čalarnosti napuhavaju se bolje, kak velike gospe. Kojem predi jedna parkanasta kiklica za veliki kinč je bila, vezda ne mogu im tovaruši zadosta zmagati penez na vsake nove mode, koje one ali z oka ali z boka moraju imati; na tuliko, da od same oholnosti ne vidiju, da im čez razdrte krove godina kaple na njihove svilne oprave. Pak je to sreča? MATIJAŠ: Tomu su zrok tovaruši, koji ova prepuščaju na hiže i imetka porušenje delati. VUKSAN: Imamo vsakojačke pelde ovakoveh zakonskeh ljudih, pak kakov im je glas? MATIJAŠ: Sudim, da dober. VUKSAN: Nič preveč. Prosim vas, je li more onde dober glas biti, kade jeden plemeniti, koj nikaj ni probuval, nikakvu službu domovini včinil, od gizdosti, da je plemenit, ne če drugač domovini služiti, zvan ako taki veliku čast ne dobi, ali vsako leto dve štenge više ne korači; zato ostavi malu službu, kajti nima tuliko na leto plače, kuliko je on kader potrošiti, odide na svoje imanje, onde sim tam lomače, konje zjahiva, kmete guli, gosti zvađa, zadnjič iz same naglosti oženi se; i drugo nikaj od svoje sreče pokazati nima, kak jeden minuš dece, koja denes zutra zbog pomenkanja dobroga othranenja jednaki divjaki budu, kak je i otec. Je li ovo dober glas? (Plune na Jugoviča.) MATIJAŠ: Istina je, to ni dober glas, ali malo je takveh rasipnikov. VUKSAN: Malo ih je, ali i oni su domovini preveč. Dapače ovakvi su zrok, da domovina naša vu veri, dobrom držanju i negdašni diki vse pa malo prepada. (Plune na Jugoviča.) MATIJAŠ: (Ov človek ne mora slamu vu glavi imati; moram ga jedno malo razdražiti, da se čisto zgovori.) - To ne more biti. VUKSAN: Moj gospone, ja se čudim, da vi drugač spametni, ovo ali ne vidite ali videti ne čete. - Ne li istina, da naši premoguči domoroci decu svoju vu stranske orsage vu navuke pošiljaju? - Ne li istina, da ova tam slobodneša jesu, ar nisu na očeh starešeh, rodbine i prijatelov, koji vekšu skrb na ovakve za nikaj imaju, kak stranski navučiteli i paziteli za ne znam kakvu plaču? - Ne li istina, da ovakvi dečaki još sami sebe ravnati ne znajuči lehko se od hman pajdašev vu vse ono vputiti pustiju, kam je volja i želja pelja; anda se i predi vsakoga zla kak dobra navčiju; ovak puni stranskeh faling i duha praznosti dojdeju vu domovinu svoju, ter kažeju doma z čini, kuliku silu novac strošiti morali jesu roditeli, da bi sini njihovi onu starinsku domovine svoje i dobroga držanja svitu sleči, ter 24

novu poleg mode iz neizbrojeneh krpic vsakojačkeh faling spletenu kakti harlakini obleči i domom donesti mogli. (Plune na Jugoviča.) MATIJAŠ: To jošče ni zadovoljen zrok zrušenja domovine. VUKSAN: To je samo početek. Ar kak brže se vu orsagu počne premenjati starinska naroda nošna, vre se pomalo kaže, kakov duh nestalnosti je vleznul vu domoroce, po kojem na dalje počneju premenjati starinsku navadu dobroga držanja, zakona i ljubavi bližnjega. I zadnjič nastani se med nje ona nesrečna želja vlastitoga dobra, kada se vsaki za svoje, nigdo pak za opčinsko dobro skrbi. (Plune na Jugoviča.) MATIJAŠ: Niti ovo ni jošče pravi zrok. VUKSAN: Poglejmo Tirolce. Oni ostaneju vsigdar pri svoji starinski navadi nošne i držanja, i po tom kažeju vu vsaki priliki, da su stalni vu veri proti Bogu, vernosti proti cesaru i ljubavi proti domovini. MATIJAŠ: Da se pri njih ova nahađaju, ne moramo se tomu čuditi, ar on narod kesno vu pameti dozori, niti je tak vučen i rasvečen. VUKSAN: Anda mora jeden narod vučen i rasvečen biti za prepasti vu vse moguče falinge? - Ja pak suprotivno nahađam. Ar koji su domovini pogibelneši: je li vučeni, ali samo rasvečeni, ali čisto nevučeni? - Meni se vidi, da oni, koji su dobro vučeni, jesu kakti trezni, koji znadu, kaj činiti moraju i onak činiju. - Koji su rasvečeni, jesu kakti na pol pijani, koji pred meglum slapov gizdosti i slaboče pameti niti dobro niti zlo prav vidiju i zato sim tam lomaču, ter kajgoder včiniju, sudiju, da je spametno, kajti ne mogu prerazmeti. - Koj čisto nisu vučeni, jesu kakti zevsema pijani, i ovi ali vu svojem miru i navadi dremleju, ali ako kaj včiniju, ne more im se tak zameriti, ar nimaju pameti vu rukah svojeh. (Plune na Jugoviča.) MATIJAŠ: Ova prispodoba je zaisto prikladna i razumna. VUKSAN: Ne mislite, da bi mi starinski purgari ne znali se tulikajše razumno i razložno spominati. Ar mi znašli jesmo, da ovakvi supijani i rasvečeni svojvoljci jesu z vekšinum nikakve vere: od duhovneh nikaj ne držiju; iz zapovedih tak božjeh kak cirkveneh norca delaju; posta nimaju kakti psi; poštene reči ne zrečeju kakti hajoši; z rečjum, vse kaj trezni obdržavaju i činiju, oni opčinjaju i zešpotavaju. Gde anda zakona ni, gde srama ni, gdje ovakvem omamlenem špotlivcem vuzde i straha ni, kaj se dobra kralj i domovina nadijati more? - O, da bi ono vezda pri nas bilo, kak je meni moj vujec plebanuš povedal, kaj je bilo negda pri Rimlaneh, da su najmre imali oštre ljudi, koje su cenzore zvali, koji su pasku imali na dobro držanje ljudi i skupa vsu oblast malovredne spačitele kaštigati. O, da je to med nami, kak bi se vezda vnogi prez razloga časti, stališa ali roda iz orsačkeh hîž ali iz Turna na Zverceh 19 zgledavali. (Plune na Jugoviča.) MATIJAŠ: Ovakve cenzore ne potrebujemo mi, ar se ovakvi jačiju vu opčinski segurnosti i sloboščini svoje plemenščine ali stališa. VUKSAN: Dosta zlo, da tak misliti moreju. Prosim vas, ako vam jeden prst na ruki gnije i vi njega nikak zvračiti ne morete, je li njega rajši ne odrežete, kak da bi pustili onu gniloču vu druge prste i celu ruku dojti? Ovakvi svojvoljni i zločestoga držanja ljudi jesu kakti gnili kotrig opčine, koji s kem duže vu opčini zadržavati se moreju, s tem vekšu pogibel doprinašaju z zločestem i spačlivem držanjem svojem drugem kotrigom opčine: ove anda z suprotivnemi i nepovoljnemi protimbami vračiti je potrebno, da zlo ono malovredne gniloče dalje nejde na druge kotrige, i ako protimbe ne hasneju, sudim, da spametneje 19 iz Turna na Zverceh - iz Tornja na Dvercima (kula Lotrščak) 25

je celoga takvoga kotriga odseči i čisto od opčine razlučiti, kak prepustiti, da z hman peldami svojemi, kakti z jednum kugum druge kotrige zatepe i celu opčinu pokvari. (Plune na Jugoviča.) MATIJAŠ: Ovakvi se jačiju z onem dekretumom tolerancije, koj je od dvora kraljevskoga zišel. VUKSAN: Kaj ste to rekli, kaj? Kaj je to za jeden deketrum? MATIJAŠ: To je kraljevska naredba, da se med sobum razlučeneh zakonov ljudi preganjati ne smeju, nego da je slobodno vsakomu živeti poleg zakona svojega. VUKSAN: To je sveta i spametna naredba, ali ja mislim, da on deketrum nima toga, da bi vsaki slobodno iz svojega zakona norca delal, ter vendar niti svojega niti drugoga obdržaval. Ar takvo osmehavanje i za nikaj držanje zakona svojega pri nikom ne vidimo, kak pri jedinom katoliku. I takveh svojvoljneh nevernikov vezdašnje vreme veliku silu imamo. (Plune na Jugoviča.) MATIJAŠ: Ali vendar i ova sila ni mogla još opraviti, da bi domovina na nikaj došla. VUKSAN: Vi bi morali, gospone, jedenput z menum k Hemetšnajdaru v krčmu iti, ovde bi vi čuli, kak se od toga naši stari purgari divane. Ni li istina, da deca naša, doklam jošče za navuk kakov prikladna nisu, vu rukah i na skrbi starešeh jesu, od kojeh se vu mladeh nogah vu strahu božjem i dobrom držanju othraniti moraju, ako hočemo iz njih hasnovite purgare i domoroce imati? Ni li istina, da deca jesu kakti opice, koja kaj čuju od starešeh, ono govoriju; kaj vidiju, onak činiju? Ni li istina, da, kak se mlada šiba grbavo ali jednako rasti pušča, onak odraste? Ovak i deca, kak se vu mladosti živeti, govoriti i činiti navčiju, ono se vu njih tak zakoreni, da vse ono i vu starosti zadržiju i vu drugu kakti naravu njim prejde? (Plune na Jugoviča i dalje govori). Ova anda deca dospeju vu ruke onakveh starešeh, koji sami nigdar Boga ne moliju; iz vere i njenjeh kotrigov si norca delaju; nedostojno od Boga i svecev govoriju; nesramne i spačlive spomenke zvekšinum pred decum imaju; poste ne odbdržavaju; duhovna gde i kak moreju opsuju; oci na jednu, matere na drugu stran na očeh dece prekoredno živuč hman pelde njim davaju. - Kade ovakve navuke, ovakve pelde vu mladosti deca zadobivaju, ne bi li njim bolje bilo, da bi im stareši oštre nože vu ruke za skončati telo, kak malovredne pelde za dušu, poštenje i dober glas na veke pogubiti, bili predali; pokehdob ovakvoga malovrednoga živlenja navada na tuliko se zakoreni vu njihovom srcu i vu naturu prejde, da ni več moguče vsem navučitelom ono popraviti, kaj ovakvi malovredni stareši nemarlivo i zevsema pokvarili jesu. - Je li se anda ne moramo bojati i nadijati, da ovakvu raspuščenu živlenja navadu ova ista deca deci negda svoji i ova nadalje odvetkom svojem nemilostivno napajala ne budu. Ar ni moguče, da bi se janci od vukov leči mogli. - Je li ne zreli ovak domovina k zrušenju svojemu? (Plune na Jugoviča.) MATIJAŠ: Pomozi mi, sveti Matijaš! Vi morate več kak Vuksan krznar biti, da tak mudro govorite. VUKSAN: Nikaj več, kak Vuksan, koma, krznar, punktum. MATIJAŠ: Mi smo čisto vu drugi spomenek zašli. Dajteda vi meni povečte, kak smo dalko mi vu našem poslu za gospona Jugoviča došli? VUKSAN: Ako nismo kuliko nazad, naprvo čisto nikaj. I zato povečte vi njemu, da bi on moral jošče jeden put tuliko let vu školah razdreti, kuliko je vre potrošil, doklam bi k takvi pameti došel, da bi sebe ravnati znal. Ar za takve, koji sami sebe ravnati ne znaju, ni žena, kajti niti nju niti decu bi ravnati znali; ovo je pako na sreču i hasen zakonskoga sta- 26